Օրհնության արարողություն Սանկտ-Պետերբուրգում ՀՀ գլխավոր հյուպատոսությունում:

13 փետրվարի, 2020

Ս.թ. փետրվարի 13-ին՝ ձեռամբ Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանի, տեղի ունեցավ Սանկտ-Պետերբուրգում ՀՀ գլխավոր հյուպատոսության օրհնության արարողություն: Հանդիսությանը մասնակցում էին Սանկտ-Պետերբուրգի և ՌԴ հյուսիս արևմտյան տարածաշրջանի հոգևոր հովիվ Պողոս աբեղա Վարդանյանը, Սանկտ-Պետերբուրգի շրջանային հայ ազգային մշակութային ինքնավարության խորհրդի նախագահ Կարեն Մկրտչյանը, հայ համայնքի անդամներ և հոգևոր դասի մի քանի ներկայացուցիչ, ովքեր Մոսկվայից ուղեկցել էին արքեպիկոպոսին դեպի Սանկտ-Պետերբուրգ:

Եզրաս արքեպիսկոպոս Ներսիսյանն իր խոսքում կարևորեց Հայաստանի պետական կառույցների և հայոց եկեղեցական կառույցների փոխադարձ նվիրվածությունը և փոխհամագործակցությունը, ընդգծելով դրա անհրաժեշտությունը հատկապես արտերկրում և, որպես նման հարաբերություններ պահպանող լավագույն օրինակներից մեկը, ի ցույց դրեց Սանկտ-Պետերբուրգը:

Գլխավոր հյուպատոսության խորհրդական Վազգեն Սարգսյանն իր և հյուպատոսության ողջ անձնակազմի խորին շնորհակալությունը հայտնեց արքեպիսկոպոսին, հավաստելով, որ փոխադարձ հարգանքի և համագործակցության մթնոլորտը գնալով ավելի է խորանում՝ ի շահ տարածաշրջանում բնակվող հայության և ի կատարումն Հայաստանի Հանրապետության առաջնահերթությունների:

Պաշտոնական մասին հաջորդեց հյուրասիրություն, որն ուղեկցվեց անկեղծ ու հետաքրքիր զրույցով Ռուսաստանում հայոց ինքնության պահպանման վերաբերյալ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր