Հայոց Ցեղասպանության 104-րդ տարելիցի միջոցառումներ Սանկտ-Պետերբուրգում:

24 ապրիլի, 2019

Հայոց Ցեղասպանության 104-րդ տարելիցի միջոցառումների շրջանակներում Սանկտ-Պետերբուրգում ս.թ. ապրիլի 24-ի առավոտյան Սանկտ-Պետերբուրգի Վասիլեօստրովսկի շրջանի «Կամսկի» այգում գտնվող Կոմիտաս Վարդապետի հուշարձանին ծաղկեպսակներ և ծաղիկներ խոնարհվեցին Սանկտ-Պետերբուրգում ՀՀ գլխավոր հյուպատոսության, Սանկտ-Պետերբուրգի կառավարության, Սանկտ-Պետերբուրգում ՌԴ ԱԳՆ ներկայացուցչության, Սանկտ-Պետերբուրգում հավատարմագրված դիվանագիտական առաքելությունների, Սանկտ-Պետերբուրգի զինվորական ակադեմիաներում ուսանող հայ սպաների և զինվորների և հայ համայնքի կողմից: Կեսօրին Սանկտ-Պետերբուրգում ՀՀ գլխավոր հյուպատոս Հրայր Կարապետյանի մասնակցությամբ Սանկտ-Պետերբուրգի Կրոնի պատմության թանգարանում տեղի ունեցավ Սանկտ-Պետերբուրգի հայ համայնքի կողմից նվիրաբերած խաչքարի բացման արարողություն, որը մշտական ցուցադրման կներկայացվի Կրոնի թանգարանում: Միջոցառմանը մասնակցում էին նաև Սանկտ-Պետերբուրգի Կառավարության Ազգամիջյան հարաբերությունների և միգրացիոն քաղաքականության իրականացման կոմիտեի ղեկավարի տեղակալ Վադիմ Օկրուշկոն, Սանկտ-Պետերբուրգի և Հյուսիս արևմտյան տարածաշրջանի հոգևոր հովիվ Պողոս աբեղա Վարդանյանը, Սանկտ-Պետերբուրգում հայ համայնքի ղեկավար Կարեն Մկրտչյանը և այլոք: Այնուհետև Սբ. Կատարինե Հայ Առաքելական եկեղեցում մատուցվեց պատարագ ի հիշատակ Հայոց Ցեղասպանության սրբադասված նահատակներին, որից հետո եկեղեցու բակում համայնքի երիտասարդական կազմակերպության ներկայացուցիչները մոմերով խաչ պատրաստեցին, որը կոչված էր հավերժացնելու ցեղասպանության զոհերի հիշատակը: Մոմավառությունից հետո Սանկտ-Պետերբուրգի Սբ. Կատարինե եկեղեցու բակում տեղի ունեցավ հանրահավաք: Հանրահավաքին ելույթներով հանդես եկան Սանկտ-Պետերբուրգում ՀՀ գլխավոր հյուպատոս Հրայր Կարապետյանը, Սանկտ-Պետերբուրգում հույների, ասորիների և այլ համայնքների ներկայացուցիչներ, հասարակական և մշակույթի գործիչներ: Հանրահավաքիից հետո հայ համայնքի «Վերնատուն» մշակութային կենտրոնում բացվեց Հայոց Ցեղասպանությանը նվիրված ցուցահանդես: Ցուցահանդեսին ներկայացված էին Սանկտ-Պետերբուրգի հայ նկարիչների աշխատանքներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր