Փետրվարի 25-ին Սանկտ-Պետերբուրգի հայ համայնքը նշեց Սումգայիթի ողբերգական իրադարձությունների 30-րդ տարելիցը:

25 փետրվարի, 2018

Փետրվարի 25-ին Սանկտ-Պետերբուրգի հայ համայնքը նշեց Սումգայիթի ողբերգական իրադարձությունների 30-րդ տարելիցը: Առավոտյան Սբ. Կատարինե Հայ Առաքելական եկեղեցում մատուցվեց զոհերի հիշատակին նվիրված պատարագ: Միջոցառմանը մասնակցեցին Սանկ-Պետերբուրգում Հայաստանի Հանրապետության գլխավոր հյուպատոս Հրայր Կարապետյանը, հյուպատոսության աշխատակիցներ, Սանկտ-Պետերբուրգի բարձրագույն զինվորական ուսումնական հաստատություններում սովորող հայ սպաներ և կուրսանտներ, Սանկտ-Պետերբուրգի հայտնի գիտական և մշակութային գործիչներ և հայ համայնքի ներկայացուցիչներ: Պատարագի ավարտից հետո ծաղիկներ դրվեցին Սբ. Կատարինե Հայ Առաքելական եկեղեցու բակում տեղադրված խաչքար հուշարձանին: Միևնույն ժամանակ երիտասարդական կազմակերպությունները ինչպես ամեն տարի Նևսկի պողոտայի վրա տեղադրել էին Սումգայիթի ոճրագործությունները դատապարտող պաստառներ, գրավելով անցորդների ուշադրությունը: Այնուհետև Սանկտ-Պետերբուրգի հայ համայնքի մշակութային կենտրոնի դահլիճում տեղի ունեցավ Սումգաիթի զոհերի հիշատակին նվիրված երեկո: Երեկոյին բացման խոսքով հանդես եկավ Սանկտ-Պետերբուրգում ՀՀ գլխավոր հյուպատոս Հրայր Կարապետյանը, որը անդրադառնալով Սումգայիթի ոճրագործություններին դատապարտեց Ադրբեջանի իշխանությունների հայատյած քաղաքականությունը, որը շարունակվում է մինչ այսօր և շեշտեց, որ նմանօրինակ հանցագործությունները ժողովրդի, ազգի, մարդկության դեմ պետք է ժամանակին իրենց արժանի գնահատականը ստանան համայն մարդկության կողմից: Միջոցառման վերջում ցուցադրվեց «Սովորական ցեղասպանություն» ֆիլմը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր