«Ռուսաստանում Հայաստանի մշակույթի օրերի» պաշտոնական փակման հանդիսավոր արարողություն Սանկտ-Պետերբուրգում

23 նոյեմբերի, 2017

Ս.թ. նոյեմբերի 23-ին Սանկտ-Պետերբուրգի ակադեմիական կապելլայում ՀՀ մշակույթի նախարար Արմեն Ամիրյանի և Սանկտ-Պետերբուրգում ՀՀ գլխավոր հյուպատոս Հրայր Կարապետյանի մասնակցությամբ տեղի ունեցավ «Ռուսաստանում Հայաստանի մշակույթի օրերի» պաշտոնական փակման հանդիսավոր արարողությունը: Միջոցառումը նվիրված էր Հայաստան-Ռուսաստան դիվանագիտական հարաբերությունների 25 ամյակին: ՌԴ-ում Հայաստանի մշակութային օրերի պաշտոնական փակման արարողությանը ելույթներով հանդես եկան ՀՀ մշակույթի նախարար Արմեն Ամիրյանը, Սանկտ-Պետերբուրգում ՀՀ գլխավոր հյուպատոս Հրայր Կարապետյանը և Սանկտ-Պետերբուրգի կառավարության մշակույթի կոմիտեի նախագահ Կոնստանտին Սուխենկոն: Իր ելույթում նախարար Արմեն Ամիրյանը նշեց. «Մշակույթը տարբեր ազգերի փոխհարաբերությունների հենց այն միջազգային լեզուն է, որն ամենաուղիղ, ամենաշիտակ և ամենակարճ ճանապարհն է դեպի սրտեր ու հոգիներ: Ես համոզված եմ, որ այս մշակութային օրերից հետո ոչ միայն մշակութային հարաբերությունները կլավանան, այլ ընդհանրապես երկու ժողովուրդների բարեկամությունը կարող է նոր շունչ ու թափ ստանալ»: Ողջունելով հյուրերին՝ Սանկտ-Պետերբուրգում ՀՀ գլխավոր հյուպատոս Հրայր Կարապետյանը նշեց. «Հայաստանի և Ռուսաստանի նախագահներ Սերժ Սարգսյանի և Վլադիմիր Պուտինի նախաձեռնությամբ Ռուսաստանում Հայաստանի մշակույթի օրերի հրաշալի մարաթոնը նվիրված է մեր երկրների միջեւ դիվանագիտական հարաբերությունների հաստատման 25-ամյակին: Իհարկե, ռուս-հայկական բազմադարյա հարաբերությունների պատմության համատեքստում, որոնք ունեն իրենց ավանդույթները, խոր արմատները և ուժեղ կապերը, ներկայիս հոբելյանը միայն առիթ է նոր հանդիպումների և շփումների, ինչպես նաև նոր նախագծերի քննարկման համար: Մշակույթի օրերն ավարտվում են, բայց մենք չենք տխրում, քանի որ հետևելու են նոր ցուցահանդեսներ և համերգներ, նոր բեմականացումներ և մշակույթի գործիչների ելույթներ: Միմիայն մշակույթն է ի զօրու լցնել մեր առօրյան հույզերի և գույների հարուստ բազմերանգով»: Սանկտ-Պետերբուրգի կառավարության մշակույթի կոմիտեի նախագահ Կոնստանտին Սուխենկոն ընթերցեց Սանկտ-Պետերբուրգի Նահանգապետ Գեորգի Պոլտավչենկոի ուղերձը: Միջոցառման փակման պաշտոնական արարողությանը Սանկտ-Պետերբուրգի պետական ակադեմիական կապելլայում եզրափակիչ համերգային ծրագրով հանդես եկան Վահագն Հայրապետյանի ջազային կվինտետը և «Հովեր» պետական կամերային երգչախումբը: Միջոցառմանը ներկա էին Սանկտ-Պետերբուրգի և Լենինգրադի մարզի կառավարությունների ներկայացուցիչներ, Սանկտ-Պետերբուրգում հավատարմագրված գլխավոր հյուպատոսներ և դիվանագետներ, ռուս մտավորականներ, հայ համայնքի ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր